- આ સમિટ ઈન્ટરનેશનલ સોલાર એલાયન્સ (ISA) એસેમ્બલીના 9મા સત્ર અને ગ્રીન હાઇડ્રોજન પરની 4થી આંતરરાષ્ટ્રીય પરિષદની સાથે યોજાશે
24 જુલાઈ 2026: કેન્દ્રીય નવીન અને નવીનીકરણીય ઉર્જા તેમજ ગ્રાહક બાબતો, ખાદ્ય અને સાર્વજનિક વિતરણ મંત્રી શ્રી પ્રહલાદ જોશીએ આજે અહીં BRE સમિટ એન્ડ એક્સ્પો 2026ના કર્ટન રાઇઝર (પૂર્વસંધ્યા કાર્યક્રમ)ને સંબોધતા જણાવ્યું હતું કે, ભારત રિન્યુએબલ એનર્જી સમિટ એન્ડ એક્સ્પો (BRE સમિટ એન્ડ એક્સ્પો) 2026નું આયોજન 2જી થી 5મી નવેમ્બર 2026 દરમિયાન નવી દિલ્હીના ભારત મંડપમ ખાતે કરવામાં આવશે.
તેમના મુખ્ય ભાષણમાં, શ્રી પ્રહલાદ જોશીએ જણાવ્યું હતું કે “BRE સમિટ એન્ડ એક્સ્પો 2026 પ્રથમ વખત અક્ષય ઉર્જાના ત્રણ મોટા કાર્યક્રમોને એક જ મંચ પર લાવશે—BRE સમિટ એન્ડ એક્સ્પો 2026, ઈન્ટરનેશનલ સોલાર એલાયન્સ (ISA) એસેમ્બલીનું 9મું સત્ર, અને ગ્રીન હાઇડ્રોજન પરની 4થી આંતરરાષ્ટ્રીય પરિષદ (ICGH). શ્રી જોશીએ વધુમાં માહિતી આપી હતી કે ‘વડાપ્રધાને BRE સમિટ એન્ડ એક્સ્પો 2026નું ઉદ્ઘાટન કરવા માટે સંમતિ આપી છે’.” તેમણે ઉમેર્યું કે “વડાપ્રધાન શ્રીની ઉપસ્થિતિ એ વિકસિત ભારતના એક મુખ્ય સ્તંભ તરીકે અને વૈશ્વિક સતત વિકાસમાં ભારતના યોગદાન તરીકે અક્ષય ઉર્જા પ્રત્યેની દેશની પ્રતિબદ્ધતા દર્શાવે છે”.
શ્રી જોશીએ આગળ જણાવ્યું કે, આ સમિટ અગ્રણી રિન્યુએબલ એનર્જી ડેવલપર્સ, ટેકનોલોજી કંપનીઓ, ઉત્પાદકો, બેટરી સ્ટોરેજ ફર્મ્સ, ગ્રીન હાઇડ્રોજન ક્ષેત્રના અગ્રણીઓ, નાણાકીય સંસ્થાઓ, આંતરરાષ્ટ્રીય સંગઠનો અને રોકાણકારોને એકસાથે લાવશે, જેનાથી એક જ છત નીચે સમગ્ર રિન્યુએબલ એનર્જી વેલ્યુ ચેઇનનું પ્રતિનિધિત્વ સુનિશ્ચિત થશે. તેમણે ઉમેર્યું કે સમિટને સાચા અર્થમાં વૈશ્વિક દ્રષ્ટિકોણ સાથે ડિઝાઇન કરવામાં આવી છે. BRE સમિટ એન્ડ એક્સ્પો માટે 34 દેશોને આમંત્રણ મોકલવામાં આવ્યું છે, જ્યારે ઈન્ટરનેશનલ સોલાર એલાયન્સે એસેમ્બલી માટે 128 દેશોને આમંત્રિત કર્યા છે.
શ્રી જોશીએ ભારપૂર્વક જણાવ્યું હતું કે વૈશ્વિક મંચ પર ભારતની વિશ્વસનીયતા તેના પરિણામો આપવાના મજબૂત ટ્રેક રેકોર્ડ પર આધારિત છે, જેણે તેને સમગ્ર વિશ્વના રિન્યુએબલ એનર્જી સમુદાયને એકત્રિત કરવા માટે સક્ષમ બનાવ્યું છે. તેમણે વધુમાં જણાવ્યું હતું કે ભારત ટૂંક સમયમાં 300 ગીગાવોટ (GW) સ્થાપિત નોન-ફોસિલ ફ્યુઅલ (બિન-અશ્મિભૂત બળતણ) ક્ષમતાનો સીમાચિહ્ન પાર કરશે. તેમણે એ પણ માહિતી આપી હતી કે ‘પીએમ સૂર્ય ઘર: મફત વીજળી યોજના’ આગામી સપ્તાહોમાં 50 લાખ લાભાર્થી પરિવારનો આંકડો વટાવે તેવી અપેક્ષા છે.
પોતાના સંબોધનના સમાપનમાં, કેન્દ્રીય મંત્રીએ ભારત રિન્યુએબલ એનર્જી સમિટ એન્ડ એક્સ્પો 2026ને વૈશ્વિક રિન્યુએબલ એનર્જી સમુદાય સાથે ભારતના જોડાણમાં એક મહત્વપૂર્ણ સીમાચિહ્ન ગણાવ્યું હતું. તેમણે કહ્યું કે આ સમિટ આ ક્ષેત્રની વૃદ્ધિ, ઉભરતી તકો અને સ્વચ્છ ઉર્જા સંક્રમણને આગળ વધારવામાં વૈશ્વિક સહયોગ પ્રત્યે ભારતની પ્રતિબદ્ધતાને પ્રતિબિંબિત કરે છે. તેમણે 2જી થી 5મી નવેમ્બર 2026 દરમિયાન નવી દિલ્હીના ભારત મંડપમ ખાતે યોજાનાર આ સમિટમાં ભાગ લેવા માટે વિશ્વભરની સરકારો, ઉદ્યોગ સાહસિકો, રોકાણકારો, સંશોધકો, ઇનોવેટર્સ, ઉદ્યોગસાહસિકો અને વિકાસ ભાગીદારોને ઉષ્માભર્યું આમંત્રણ પાઠવ્યું હતું. શ્રી જોશીએ વિશ્વાસ વ્યક્ત કર્યો હતો કે આ સમિટ અક્ષય ઉર્જા ક્ષેત્રે નવી ભાગીદારીને પ્રોત્સાહન આપશે, રોકાણ વધારશે, નવીનતાને પ્રોત્સાહિત કરશે અને આંતરરાષ્ટ્રીય સહયોગને મજબૂત બનાવશે.
કર્ટન રાઇઝર કાર્યક્રમ દરમિયાન, શ્રી જોશીએ BRE સમિટ એન્ડ એક્સ્પો 2026ના અધિકૃત લોગો ‘ઉર્જા ચક્ર’નું અનાવરણ પણ કર્યું હતું, તેમજ સમિટ માટે અધિકૃત ડિજિટલ પોર્ટલ અને મોબાઇલ એપ્લિકેશન લોન્ચ કરી હતી.
ઉર્જા તેમજ નવીન અને નવીનીકરણીય ઉર્જા રાજ્ય મંત્રી શ્રી શ્રીપદ યેસો નાઇકે હાઇલાઇટ કર્યું હતું કે “ભારતનું રિન્યુએબલ એનર્જી સંક્રમણ દેશભરના રાજ્યોના સામુહિક પ્રયાસો દ્વારા સંચાલિત થઈ રહ્યું છે. તેમણે નોંધ્યું કે રાજસ્થાન પોતાના વિશાળ સોલાર સંસાધનોનો ઉપયોગ કરી રહ્યું છે અને ગુજરાત ખાવડા ખાતે વિશ્વનો સૌથી મોટો હાઇબ્રિડ રિન્યુએબલ એનર્જી પાર્ક વિકસાવી રહ્યું છે, જ્યારે અન્ય કેટલાક રાજ્યો હાઇડ્રોપાવર, ફ્લોટિંગ સોલાર, બાયોમાસ અને વિકેન્દ્રિત રિન્યુએબલ એનર્જીને આગળ ધપાવી રહ્યા છે, જે સહકારી અને સ્પર્ધાત્મક સંઘવાદની ભાવના દર્શાવે છે”.
નવીન અને નવીનીકરણીય ઉર્જા મંત્રાલયના સચિવ શ્રી સંતોષ કુમાર સારંગીએ જણાવ્યું હતું કે, “ભારતનું રિન્યુએબલ એનર્જી ટ્રાન્સફોર્મેશન ચાર મુખ્ય સ્તંભો પર નિર્માણ પામ્યું છે—નીતિગત સ્થિરતા, બજાર નિર્માણ, ઇકોસિસ્ટમ ડેવલપમેન્ટ અને ટ્રાન્સમિશન ઇન્ફ્રાસ્ટ્રક્ચર. તેમણે કહ્યું કે ઉર્જા સંક્રમણનો આગામી તબક્કો હાઇબ્રિડ રિન્યુએબલ એનર્જી પ્રોજેક્ટ્સ, બેટરી એનર્જી સ્ટોરેજ સિસ્ટમ્સ, ફ્લોટિંગ સોલાર, એગ્રીવોલ્ટેઇક્સ અને નેશનલ ગ્રીન હાઇડ્રોજન મિશન દ્વારા સિસ્ટમ ક્ષમતાઓને મજબૂત કરવા પર ધ્યાન કેન્દ્રિત કરશે”. તેમણે ઉમેર્યું હતું કે “ભારત રિન્યુએબલ એનર્જી સમિટ એન્ડ એક્સ્પો (BRE સમિટ એન્ડ એક્સ્પો) 2026 સરકારો, ઉદ્યોગો, રોકાણકારો, ઇનોવેટર્સ અને આંતરરાષ્ટ્રીય ભાગીદારોને ક્લીન એનર્જીમાં રોકાણ, ટેકનોલોજી ભાગીદારી અને સહયોગને ઝડપી બનાવવા માટે એક સમાન મંચ પૂરો પાડશે”.
આ કાર્યક્રમ દરમિયાન મંત્રાલયના વરિષ્ઠ અધિકારીઓ સાથે અનેક રાષ્ટ્રીય અને આંતરરાષ્ટ્રીય પ્રતિનિધિઓ ઉપસ્થિત રહ્યા હતા.
